Спадчына: 2018

воскресенье, 19 августа 2018 г.

Жнiвень

Усё навокал зелянее.

Пабялелi толькi нiвы,
Нiбы хмаркi ў сiнім небе.
Гэта жнiвень, гэта жнiвень.

Паглядзi, ужо рабiна
Чырванее сарамлiва,
А ў садах сiнеюць слiвы.
Гэта жнiвень, гэта жнiвень.

У жнiўнi кожны з нас багаты,
Сыты нават i лянiвы.
Поўны стол у кожнай хаце.
Гэта жнiвень, гэта жнiвень.

Лета месяц ты апошнi
I зусiм не ганарлiвы,
Уздыхнуць спакойна можна,
Як стаiць на ганку жнiвень

Халады яшчэ далёка,
I таму такi шчаслiвы.
Выйду ў поле i галёкну:
«Я цябе вітаю, жнiвень!»

Уладзімер Гардзейка

понедельник, 26 февраля 2018 г.

Тыдзень беларускай мовы і літаратуры

Якая прыгожая, мілагучная, мяккая і ў той жа час яскравая, звонкая, моцная, поўная наша мова! На кожны выпадак знойдзецца ў ёй і патрэбнае слова, і трапны фразеалагізм. На гэтай мове размаўлялі нашы дзяды і прадзеды, за яе змагаліся нашы продкі. Толькі гэтую мову мы можам назваць роднай, бо гэта мова нашай зямлі.

Але зараз беларуская мова пакрыху забываецца, “губляюцца” яе адметныя словы, усё радзей чуеш яе на вуліцы.
І каб прывіць вучням цікавасць і любоў да роднай мовы, у Жамыслаўльскім дзіцячым садзе - базавай школе з 19 па 24 лютага прайшоў Тыдзень беларускай мовы і літаратуры.

Кожны дзень Тыдня быў напоўнены змястоўнымі і цікавымі мерапрыемствамі. Так, былі праведзены конкурс "Малюем ілюстрацыі да твораў", віктарына "Самы кемлівы", гульня- конкурс "Таямніцы родных слоў", моўны турнір "З любоўю да роднага слова", музычны калейдаскоп "Сэрцам народжаны спеў...", флэш-моб "Мы любім родную мову" і інш.

Тыдзень мовы і літаратуры закончыўся, але ёсць упэўненасць, што кожны вучань знайшоў нешта сваё. А галоўнае — вучні ўсвядомілі: наша беларуская мова жывая і сапраўдная. Таму кожны, хто нарадзіўся на гэтай прыгожай, гасціннай зямлі, павінен не толькі валодаць ёю дасканала, але і шанаваць, захоўваць.

А мне застаецца толькі падзякаваць усім, хто прымаў удзел і дапамагаў у арганізацыі мерапрыемстваў на працягу Тыдня, і спадзявацца на тое, што праца не была марнай. І хочацца верыць, што тыя вучні, якія душой дакрануліся да творчасці беларускіх паэтаў і пісьменнікаў, будуць імкнуцца, каб роднае слова “гучала ў вяках.”